Skip to main content

آریانا افغانستان آنلاین

مقالات
اخبار روز
فهرست مندرجات
لغت نامه
گنجینۀ شعر و ادب
آرشیف ویدیوها
جنتری
سایت های افغانی
Go Search
 اخبار امروز (پښتو l دری)     اخبار روز های گذشته

 
  
د افغانستان او پاکستان مشرانو پر مهمو سیمه ییزو مسلو خبرې وکړې
منبع: تاند        تاریخ: 8/4/2020

تاند (سې شنبه، د اسد۱۱) د افغانستان ولسمشر محمداشرف غني او د پاکستان صدراعظم عمران خان د دوشنبې په ورځ ناوخته یو بل ته د اخترمبارکۍ ترڅنګ پر مهمو سیمه ییزو موضوعاتو خبرې وکړې.

د پاکستاني رسنیو د راپور له مخې، صدراعظم عمران خان د افغانستان ولسمشر ته د اختر مبارکۍ د ویلو په ترڅ کې وویل چې سږ کال دا لوی اختر په داسې وخت کې راغی چې نړیواله ټولنه د کورونا وایرس په ګډون له یو شمېر ستونزو سره مخامخ ده.

د پاکستان د صدراعظم د دفتر له لوري له خپرې شوې خبرپاڼې سره سم، عمران خان له ولسمشر غني سره په خبرو کې د کورونا وایرس له کبله د انسانانو پر مړینو خواشیني ښکاره کړه او هیله یې وکړه چې دا وبا ژر کنټرول شي.

صدراعظم عمران خان په خپل هیواد کې د کورونا وایرس په وړاندې د خپل حکومت د ستراتیژۍ په اړه د افغانستان ولسمشر ښاغلي غني ته معلومات ورکړل او ویې ویل چې زیات تمرکز یې پر دې دی چې د خلکو ژوند وژغورل شي، اقتصاد یې زیات تاوان ونه ویني او په مجموع کې اقتصاد خراب نه شي.

د دې ټېلفوني خبرو په لړ کې د دواړو هیوادونو مشرانو د افغانستان د سولې پر پروسې هم خبرې وکړې.

عمران خان د افغانستان د سولې په پروسه کې د خپل هیواد د مثبت رول یادونه وکړه او ویې ویل چې د افغانستان سوله د پاکستان په ګټه ده.

ده همداراز وویل چې د امریکا او طالبانو ترمنځ د دوحې موافقه به د افغانانو ترمنځ د سولې د خبرو سبب شي.

تر دې وړاندې هندي رسنیو وویل چې د دغه هیواد صدراعظم او د افغانستان ولسمشر د ویدیوکنفرانس له لارې د دوشنبې په ورځ خبرې وکړې.

د افغانستان حکومت تراوسه پورې د هند او پاکستان له صدراعظمانو سره د افغانستان د ولسمشر د خبرو په باب څه نه دي ویلي.


  
د افغانستان دفاع وزارت د اوربند د نقضولو پېښې څیړي
منبع: دامریکا غږ        تاریخ: 8/4/2020

د افغانستان د دفاع وزارت وايي چې د لوی اختر په ورځو کې له طالبانو سره د اوربند پر مهال د ناامنیو پېښو په تړاو څیړنې کوي.

د دغه وزارت د ویاند مرستیال فواد امان د یکشنبې په ورځ د اګست په دویمه (زمري ۱۲) امریکا غږ ته وویل چې له طالبانو سره د درې ورځني اوربند پر مهال د افغانستان په مختلفو سیمو کې د ناامنیو څو محدودې پېښې رامنځ ته شوي دي.

هغه زیاته کړه: "د افغانستان امنیتي او دفاعي ځواکونو د اوربند ټول اصول او قواعد رعایت کړي دي او همداشان اوربند ته پابنده او ژمن پاتې کېږي. د افغانستان خلک دا تمه له طالبانو څخه هم لري".

ښاغلي امان دا څرګنده نه کړه چې د ناامنیو دغه پېښې په کومو ولایتونو کې او د چا له خوا رامنځ ته شوي دي.

نن یکشنبه د افغان حکومت او طالبانو ترمنځ د موقت اوربند وروستۍ ورځ ده چې دواړو خواو له لوی اختر څخه مخکې پر یو بل د برید نه کولو اعلان کړی و.

د افغان حکومت او طالبانو له دغه اقدام څخه په ملي او نړیواله کچه پراخ هرکلی وشو.

د افغان حکومت او طالبانو ترمنځ د لوی اختر په درېیو ورځو کې اوربند په داسې حال کې شوی چې ټاکل شوې دواړه خواوې د بندیانو د خوشې کولوپروسې له بشپړېدو وروسته د سولې مخامخ خبرې پیل کړي.


آريانا افغانستان آنلاین
تماس با ما برای ارسال مقالات: info@arianafghanistan.com  و یا spineghar@gmail.com 

Besucherzaehler